網紅的藏寶箱記得10多年前從加拿大讀完書回港入行追夢，最初我係因為鍾意唱歌所以一心想成為一位歌手。由參加歌唱比賽輸咗到入咗訓練班成為一位演員，再到後來有機會俾我真係再唱返歌⋯⋯唔經唔覺就已經10幾年。今年38歲嘅我同大家一樣經歷住呢幾年嘅社會動盪、疫情，新媒體嘅取代，事件政治化等等⋯⋯。同好多同我差唔多年紀，喺社會工作咗一段時間，被新一代年青人稱之為「廢老上身」嘅人一樣。對好多嘢都抱住另一個唔同嘅價值觀，好多控訴，好多憤怒。甚至乎開始懷疑自己。覺得自己嗰一套脫咗節。再加上工作上同自身上遇到嘅種種問題（例如：懶惰、固執、運氣、EQ低，等等⋯⋯）一度令到我想放棄。有一段時間我覺得我好討厭我而家做緊嘅嘢，想離開娛樂圈。冷靜落嚟撇開負面情緒，發現原來歸根究底就係忘記咗初心。忘記咗當初自己追夢嘅時候捱麵包做茄喱啡。每日好窮好辛苦，做出嚟嘅嘢亦都唔係有好多人睇得到，但係唔知點解每一日都好開心。開心唔係因為有幾多觀眾幾多fans睇到我嘅演出。開心係因為我自己感覺到自己好熱血咁追緊夢。係由心而發嘅開心。（做茄喱啡R撈嘅時候、一個人去韓國學跳舞嘅時候、拍我自己寫嘅歌嘅MV做打雜嘅時候、同一班好朋友喺街度busking嘅時候)呢啲全部都唔係我為人熟悉嘅作品。甚至乎大家根本唔知道同唔care我做過呢啲嘢。但係呢啲嘢最後出嚟嘅嗰種開心嘅滿足感係冇嘢可以取替，係最真。最開心嘅。某程度上如果以上我做過嘅嘢，我只需要對自己交代嘅話，我認為我係成功嘅。因為至少我做嘅嘢真正感動咗我自己，我得到我呢一位忠實嘅觀眾。何謂成功？成功在於堅持。堅持什麼？堅持在《Give my best, leave the rest》。最近我追緊兩個綜藝節目：TVB嘅《好聲好戲》同ViuTV嘅《Error自肥企画》（仲有花姐Error遊1&2）。其實當大家見到節目製作用心，真心同不忘初心。香港觀眾係會返嚟嘅。我哋做表演行業嘅如果一尾想叫大家少啲批評多啲支持香港娛樂圈。其實最簡單就係做好我哋自己嘅製作。有一句說話：《Actions speak louder than words》用最初心嘅熱誠做啲好嘅節目出嚟。觀眾係唔需要支持嘅。觀眾自然會追住嚟睇。因為最簡單嘅道理：「好睇」！
#千字文其實係想叫大家睇我套劇 #我哋套劇沒有最好嘅budget #但係有古裝查案神仙三角戀嘅gimmick #一笑渡凡間 #tvb
Search